لسنين طويلة كنت عايشة جوا دماغي… صوت النقد عالي، إحساس إني مش مهمة، ولوم مستمر على كل تفصيلة. مع إني درست علم نفس وعلاج نفسي وأسري، اكتشفت إن العلم لوحده مش بيطفي الصوت اللي بياكل جوا الروح. اللحظة الفارقة كانت لما فهمت إن الرحلة داخلية مش خارجية… وإن مساحتي الداخلية هي نعمة كبيرة ربنا ادهالي، ومسؤوليتي أحافظ عليها. وفي يوم محدد جدًا، وأنا واقفة قدّام المرايا، لاحظت إن فيه حاجة جوّايا اتغيّرت. لأول مرة ما كنتش شايفة عيوب… لقيتني حاسّة بحب وتقدير للبنت اللي قدّامي، و لقيتني ببتسملها. إحساس بسيط لكنه عميق ونقي… إحساس إن ربنا عمره ما بيخلق حاجة وحشة. اللحظة دي كانت أول علامة إن العلاقة بيني وبين نفسي ابتدت تتصلّح… وإنّي أخيرًا شايفة نفسي بعين الرحمة مش بعين الجلد. وبقيت عارفة إن الرجوع للروح هو البداية الحقيقية لأي تشافي. من ساعتها، ومع الوقت، الصوت اللي كان بيجلدني هدي، وثقتي في إحساسي رجعت، وبقيت سامعة صوت البصيرة بوضوح. النهارده بشتغل كمعالجة نفسية وروحية معتمدة، ومتدرّبة على تقنيات مختلفة من مدارس وعلوم متعددة في العلاج النفسي، الطاقي، والسُّلوكي. بخبرة أكتر من ١٠ سنين بدمج ما بين العلم والحدس… وبساعد الناس يمشوا نفس الطريق اللي أنا مشيته: يهدّوا صوت النقد، يبنوا أمان داخلي، ويرجعوا يسمعوا نفسهم بصدق